काठमाडौं, सेप्टेम्बर ६ । मन्त्रीपरिषद बैठकले अनमिनको म्याद थप्ने जिम्मा प्रधानमन्त्री माधवकुमार नेपाललाई दिएको छ । मन्त्री परिषदको आज बसेको बैठकले अन्य दलहरुसित छलफल गरेर म्याद थप्न प्रधानमन्त्रीलाई भनेको हो । यसअघि बसेको सेना समायोजन विशेष समितिको बैठकले समिति अन्तर्गतको प्राविधिक समितिको म्याद ४ महिनाका लागि थप गरेको छ । प्राविधिक समितिको म्याद ४ महिना थप भएपछि अनमिनको म्याद पनि ४ महिना थपिने निश्चित प्रायः छ ।
यसैबीच सेना समायोजन विशेष समितिको बैठकमा एनेकपा माओवादीले कुनै शर्तबिना अनमिनको म्याद ६ महिना थप्न गरेको प्रस्तावलाई अन्य दलहरुले अस्वीकार गरेका छन् । अरु दलहरुले सेनामाथिको अनुगमन हटाएर अनमिनको म्याद ४ महिना थप गरिनुपर्ने बताएका छन् भने यसमा माओवादी सहमत भएको छैन ।
