रामचन्द्र गुरुङ
अल्डरशट/नोभेम्बर १९७९ मा भर्ती भएका भूपू गोर्खाहरुको तेस्रो वाषिर्क भेटघाट मे १ तारिख अल्डरशट कनाउट स्कूलको प्राङ्गढमा एक कार्यक्रमबीच भएको छ । भेलामा बेलायतमा बसोबास गर्दै आएका १९७९ का नम्वरीहरुको उपस्थिति थियो । भेलामा नम्वरीहरुले आफ्ना अनुभवहरुको स्मरण गर्दै पारिवारिक मिलनको अनुभूति गरेका थिए । नम्वरीहरु भेला भएको सो रमाइलो वातावरणमा कार्यक्रमका मुख्य व्यवस्थापक सुवास गुरुङले भेलाको उद्देश्य र महत्वको बारेमा चर्चा गर्नुभएको थियो । रामचन्द्र गुरुङले संस्थाको हालसम्मको आयव्ययको विवरण प्रस्तुत गर्नु भएको थियो । त्यसै गरी भेलाको स्थान र खानपान व्यवस्थापक रुद्र शाहीले ढिलै भएपनि धेरैजनाको उपस्थिति भएकोमा सबैलाई धन्यवाद दिँदै अन्तिमसमयमा नाम नपठाउनाले खानाव्यवस्थामा अप्ठेरो परेको भन्दै भविष्यमा अलि छिट्टै नाम पठाउन अनुरोध गर्नु भएको थियो ।
भेलामा उपस्थित सबैका अनुहारहरु रसिला हंसिला र फूर्तिला देखिन्थे । वर्तमान भन्दा अतित मीठो हुन्छ भनेझैं ३० वर्षअघिका क्षणहरुलाई नम्वरीहरुले एकआपसमा स्मरण गरेका थिए । बेलायतको व्यस्त जीवनका बाबजुद नम्वरीहरुले यस्तो भेलालाई निरन्तरता दिई आपसी सम्वन्धलाई दीर्घ राख्ने प्रण समेत गरेका छन् । हालै हृदयघात भइ निधन हुनुभएका नम्बरी २११६२९६५ हुमबहादुर थापाको आत्माको चीर शान्तिको कामना गर्दै नम्वरीहरुले २ मिनेट मौनधारण श्रद्धाञ्जली प्रकट गरेका थिए ।
कार्यक्रममा नम्वरीहरुले नाचगान गरी रमाइलो गरेका थिए । मथुरा र हेम गुरुङको सुमधुर गीत, तिर्थको चुटि्कला र कविताले कार्यक्रमलाई थप मनोरञ्जक बनाएको थियो । लोकदोहोरी गीतको भाकामा आआफ्नै पारामा नाचेर सबै नम्वरीहरुले आनन्द लिएका थिए ।
