काठमाडौं, मे ७ । एकीकृत नेकपा माओवादीको हड्ताल छैटौं दिन पनि राजधानी काठमाडौं लगायत देशभर जारी छ । कोटेश्वर, कलंकी, बालाजु, गांगबु, नयाँ बानेश्वर, पुतलीसडक, सुन्धारा लगायत राजधानीका प्रमुख चोकहरुमा माओवादीका सयौ कार्यकर्ताहरुले शान्तिपूर्ण रुपले हड्ताल सफल पार्न सडकमा बसेका छन् । देशका अन्य सहरहरु बिराटनगर, विरगञ्ज, जनकपुर, चितवन, बुटवल, धनगढी लगायतका स्थानमा पनि हड्ताल सफल पार्न हजारौ माओवादी कार्यकर्ताहरु सडकमा छन् ।
यसैबीच ललितपुरस्थित सातदोबाटोका स्थानीयबासीहरुले माओवादी कार्यकर्ताका लागि ७ क्विन्टल चामल, २५० किलो मासु, सहयोग गरेका छन् ।
यसैबीच एकीकृत नेकपा माओवादीले तरकारी ओसारपसार गर्ने सवारी साधनमाथि अवरोध नगर्ने भएको छ । माओवादीको सो निर्णयसँगै राजधानीमा तरकारी बोकेका ट्रकहरु भित्रिन थालेका छन् । आन्दोलनको समिक्षा गर्न बसेको माओवादी पदाधिकारी बैठकले तरकारी ओसार पसारलाई अवरोध नगर्ने तथा बजारपसल अव दैनिक ४ घण्टा साँझ ६ बजेदेखि १० बजेसम्म खुलाउने निर्णय गरेको हो ।
