काठमाडौं, मे ७ । उद्योगी व्यवसायी तथा पेशागत संघसंस्थाका प्रतिनिधीहरुले राजनीतिक दलहरुले २ दिनभित्र सहमति नगरे, आफुहरु पनि सडकमा ओर्लने चेतावनी दिएका छन् । शान्तिका पक्षमा जनदवाव सिर्जना गर्ने उद्देश्यले उद्योग वाणिज्य महासंघ र विभिन्न पेशागत संस्थाले आज काठमाडौंमा गरेको सभालाई सम्वोधन गर्दै उद्योग वाणिज्य महासंघका अध्यक्ष कुशकुमार जोशीले तत्काल राजनीतिक सहमति कायम गर्न दलहरुलाई सुझाव दिनुभयो ।
नेपाल बार एसोसियसनका अध्यक्ष प्रेमबहादुर खड्काले वार्ताहरु निश्कर्षहिन भए, सहमति भएन भनेर बस्ने अधिकार दलहरुलाई नभएको भन्दै सहमतिको माग गर्नुभयो । कलाकार मदनकृष्ण श्रेष्ठ, हरिवंश आचार्य लगायत अन्य पेशामा आवद्ध रहेकाहरुले पनि सहमतिका लागि दलहरुलाई आग्रह गरेका छन् । माओवादी अवरोधकाबीच शान्ति सभा सम्पन्न भएको हो । माओवादीका कार्यकर्ताले यसअघि विभिन्न स्थानमा शान्ति सभा बिथोल्न प्रयासहरु गरेका थिए ।
