लण्डन/ बृटिश गोर्खाहरुको पुरानो संगठन गेसो र यसका अध्यक्ष पदमबहादुर गुरुङमाथि छानविन गर्न बेलायत सरकारले समिति गठन गरेको भन्ने समाचारले आफू आश्चर्यमा परेको गेसोका अध्यक्ष पदमबहादुर गुरुङले बताउनु भएको छ । अध्यक्ष गुरुङले विज्ञप्ति जारी गर्दै आफू र आफूले नेतृत्व गरेको संगठनमाथि छानविन गर्न युके सरकारले उच्चस्तरीय समिति गठन गरेको आफूले सञ्चार माध्यमबाट थाहा पाएको उल्लेख गर्नु भएको छ ।
तर बेलायत सरकारले के आधारमा त्यस्तो समिति निर्माण गरेको भन्ने आफूलाई कुनै जानकारी नभएको बताउँदै अध्यक्ष गुरुङले गेसो र यसको नेतृत्वको नाममा के भएको हो भन्ने कुरा कुनै पनि आधिकारिक स्रोतले सूचित नगरेको समेत विज्ञप्तिमा जनाउनु भएको छ । केही बेलायती समाचारपत्रहरुमा होव एण्ड को सोलिसिटर, गेसोका नेतृत्वदायी व्यक्तिहरु र गोर्खाका लागि लडिरहेका अन्य सार्वजनिक व्यक्तित्वहरुमाथि आक्रमणको प्रयास गर्दै बेलायत सरकारका मन्त्रीको नामबाट थुप्रै आरोपहरु सहितको विज्ञप्ति समेत जारी भइरहेको बताउँदै गेसोमाथि लगाइएका यस्ता आधारहिन, मनगढन्ते तथा बढ्याइचढ्याइ गरिएका आरोपहरु आफूहरुको गंभीर चासोको विषय भएको समेत अध्यक्ष गुरुङले विज्ञप्तिमा उल्लेख गर्नु भएको छ ।
